یہ کون مجھ کو چُھو رہا ہے دھڑکنوں کی آگ سے
یہ کس کے لَب کی آنچ میرے کان کی لوؤں کو چُھو کے
ڈھل رہی ہے میرے قتلِ عام میں
یہ کون ہے
یہ کس طرح کے آتشیں گُلال کوئی پِیس کر
مرے بدن میں بھر رہا ہے دم بدم
تھرک رہا ہے جاں گُسِل حصار میں رُواں رُواں
سمٹ رہا قدم قدم وجود اپنے آپ میں
جُدا جُدا ہیں ہڈیاں مگر کچھ اس طرح کہ لَمس میری کھال ہو چکا
دریدگی سے پور پور بے مثال ہو چکا
تو روک لو خداۓ جسم و جان کو
خدارا ۔۔ کوئی روک لو
کہ سانس کو جگہ ملے
تپک رہے وجود میں ذرا سی بارشیں گُھلیں،
ذرا سی ٹھنڈکیں ملیں
کہ آنچ کچھ خفیف ہو
نصیب ہو ہمیں جمالِ کم نما
قریب ہو خداۓ نار و زمزمہ