آخنے چروکنے ویلیاں وچ
میراں ہوراں تے پورن جی
پوٹھوہار نال لگنی اس تہرتی کی
میلاں نی مسافرت طے کری کے
آباد کیتا
اج اتھے نے بسنے والے
میراں پورن نے متوالے
اس تہرتی کی میرپور آخنے نے
سائیں میراں سے ولی اللہ
تے پورن ایشور بھگتی سے
خالق نے سو سو روپاں آلے
اس شہر ے ای اپنے پرکھیاں نیاں
مٹی اچ دبیاں کج یاداں یاں
پانی اچ ڈُبے مندر اے
تے درباری محراباں یاں
قبراں نے تروٹے تختے اے
تے پرانے اجڑے رستے اے
اس شہرے ایر باراں مہینیاں وچ
بس دو ای موسم اشنے نے
گرمیاں ای ہر سُو پانی رہنا
تے سردیاں ای کھنڈر دسنے نے
اتھے نے مقامی بانے نے
کہ ڈیم تے خون نا پیاسا یا
جدوں وی پارلے پاسے تھی
پانی ای چھوڑیا جانا نے
ادوں وے نہ وے منگلا وچوں
لاشاں ای کڈیا جانا نے
اے تہرتی اساں نال رُسی اے
کہ اپنے پرانے پرکھیاں نیاں
سب یاداں ای اساں برم کیتا
ہائے میراں تے پورن جی
یو کیہجا اساں کم کیتا