سانولی کُون یے
کوئی نی جاننا کہ سانولی کُون یے
پَر شاعری نے دربارے وِچ
سانولی نے بوسے نی بڑی اہمیت یے
تے استعاریاں اور کنایاں نے محلے وِچ
سب تھی مقبول کوٹھی وی سانولی نی ای یے
جس نے باہر ایک تہوپ گلی یے
جِتھے ہر روز ہیک نویں سویر ناں خواب دیکھنے نے عوض
سانولی چاندی ناں کشکول چائی اہنی رات بیچنی اے
روز ناں مال روز ای بِکی جاناں
پَر تہوپ گلی وِچ کدے کُسے دہیں چڑھنا نئی دیکھیا
کہ سار دن تے دہیں چڑھنے نا خواب دیکھنے وچ لنگی جانا
اور نواشاں اولنیاں اے ہیک اور رات بکنے وسطے تیار ہونی
سانولی اس کاروبارے وچ کس راح پئی
کوئی نہی جاننا
سانولی تھئی کُون اے وی کوئی نئی جاننا
پَر شاعری نے دربارے وِچ
سانولی نے بوسے نی بڑی اہمیت یے
تے استعاریاں اور کنایاں نے محلے وِچ
سب تھی مقبول کوٹھی وی اُسے نی یے