پہلے پہل جلے ماجر نی سے
ملخاں اچ باہرے نے تاجر نی سے
مقامی جینویاں یر مقامی ای سے
نہ کوئی اوپرا کالا سا
تے نہ کوئی اوترا گورا سا
کھُلیاں ٹہنڈیاں ایر دادی ماڑی
کنکاں مکاں رہوانی سی
کھوڑے نی چھاماں تھلے بئی کے
دنداں ایر سکڑا لانی سی
شامی ککڑ ، پہارو ہکی
پسارے ای رونق لانی سی
پھیدری نیمبل ہوسی یا فر
ساری تیاڑی بدل برسی
اکھیاں افراں کری کے
تاریاں ای تکی بانی سی
ساری تہاڑی ریٹھے چھِلنی
جس نال صبون بنانی سی
سیالیاں ای لو پخانے وسطے
بوٹیاں روں جیغن لوانی سی
کیہڑی جڑی بوٹی سی
جیڑی اسکی سئی نی سی
کاوہ، تُوڑا، داڑو، گنار
تمبر، صنبل، یا کچنار؟
جلے گراں اچ ہوئی جاوے
کُسے کی وی پیلیا بخار
دستی دادی اٹھنی سی
پارلے سِرے ایر پجھنی سی
اتھوں کاچاں ماچاں چنی
ہیکے لپے ای کہڑو کہڑی
ماندیاں نا (ع)لاج کرنی سی
دادی ماڑی ڈاھڈی سی پر
جلے کُرے روح اشنا ساس
ساریاں ای اگے پچھے بہالی
سنتالی(۴۷) نی کہانی سنانی سی
سرے ایر مہندی لانیاں لانیاں
سِکھڑینیاں نی گالی گانی سی