دریاں نے سازے نی لَے نے اُپر
ڈونگی ڈاواں نے رولے نی شہہ نے اُپر
مچھی ماراں کی میں تکانی ہونی سیاں
لم چُوفڑے ای نال بٹھانی ہونی سیاں
رخ موڑی کے دریاں نے ڈیم بنی گے
ماڑے پرندے اللہ جانے کدھر گنویں گے
پہاڑاں نے اُوچے تاجاں نے اُپر
نکیاں ار کھبیاں تراڑاں نے اُپر
چاڑھے ناں گیت میں چننی ہونی سیاں
بدلے نی تھاپ میں سننی ہونی سیاں
اوچیاں درمنیاں ار ہن ریستوران بنی گے
ماڑے گیت اللہ جانے کدھر گنویں گے
ریڑے تے چِڑے نے بوٹیاں نے اپر
سمُوتھرے تے کھِلھراں نے بُورے نے اپر
محبت نیاں اتھریاں بیلاں چڑھنیاں سیاں
ٹن ٹنے آر جناں نیاں اکھیاں بلنیاں سیاں
جنگل کپی کے سارے کارخانے بنی گے
ماڑے جگنو اللہ جانے کدھر گنویں گے