مسافر!
مجھے اپنی چھاگل میں بھر لے
پیالے میں انڈیل
  کوزے میں چھلکا
گھڑولی میں ڈھک کر یہیں اپنے خیمے کے کونے میں دھر لے
مصفا رہوں مجھ پہ اتنا کرم کر
کوئی شکل دے دے
۔۔۔۔۔
مجھے مجھ پہ مت چھوڑ
سورج مجھے لے اڑے گا
کہیں کوئی پیاسا پکھیرو ہی پانی کے نشے میں میرا بدن توڑ دے گا
درندے کئی
چار پیروں پہ چلتے ہوئے میرے نزدیک آنے لگے ہیں
کرم کر۔۔۔کرم!
بے رخی جوئے کم آب پر
مصفا رہوں مجھ پہ اتنا کرم کر
صراحی میں بھر لے
مجھے اپنے اسباب میں بار کرلے
اگر تو نہ ہوگا
تو سورج مجھے لے اڑے گا
پکھیرو۔۔۔۔درندے۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ابھی دن نکلنے سے پہلے مجھے جرعہ جرعہ چڑھا لے
مجھے اپنی سیراب فطرت کا حصہ بنا لے