کہاں اپنا نشاں پاۓ گی دنیا
نئی دلچسپیاں پاۓ گی دنیا
یہ جس میں ہم کسی کو ڈھونڈتے ہیں
یہی وقت رواں پاۓ گی دنیا
بس اک گل کے نہ ہونے سے چمن میں
فقط رنگ خزاں پاۓ گی دنیا
نہ کوئی بات ہوگی کرنے والی
نہ کچھ لطف بیاں پاۓ گی دنیا
نہ اس کو جو روانہ ہو چکا ہے
نہ گرد کارواں پاۓ گی دنیا
نہ کوئی خواب دیکھیں گی اب آنکھیں
نہ کوئی ترجماں پاۓ گی دنیا
بہت پرشور ہوگا دل کا دریا
خموشی کی زباں پاۓ گی دنیا
پرانی مشعلیں تو بجھ چکی ہیں
کسے شعلہ بجاں پاۓ گی دنیا