ہر طرف اب دھوپ کے روشن ورق ہیں
جن پہ کوئی لکھ رہا ہے
میری دنیا کی سیاہی سے وہ سچّا نام
جس میں اک ذرا سا پیار بھی ہے۔

اتنے روشن راستوں کی خیرگی میں چلتے چلتے
جتنا کچھ کھویا ہوا تھا مل گیا ہے۔
تیری تنہا یاد پھولوں اور کانٹوں سے ڈھکی
اور دُور تک پھیلی ہوئی دیوار بھی ہے۔

کیسا گہرا صبر ہے دنیا کی ساری روشنائی۔
دل کا غم اب دُھل چکا ہے۔
یہ ہوا آوارگی کی اور وارستہ سے رستے۔
کیسی تنہائی سے ہوں دوچار جو سرشار بھی ہے۔

ٹوٹتے جاتے ہیں رشتے، روشنی بھی ہے رہائی۔
کون ہے جو میرے دل میں آبسا ہے؟
یک بیک ہونٹوں پہ آتا نام جو میرے لیے اب
اک اَدھورا پَن بھی ہے، اسرار بھی ہے؟

روشنی سے بھی زیادہ مجھ میں کیا وارفتگی ہے؟
دھوپ کے دامن کو سایے سے سِیا ہے۔
آج کا دن میری خاطر ہے محبّت کا سفر جو
آ ر بھی ہے پار بھی ہے۔

کیا اسے بھی اتنی جل تھل روشنی میں یاد ہو گا،
جو مجھے بھولا ہوا ہے،
کون تھا میں، کون سی دنیا تھی میری؟
یہ تمنّا یاد رہ جانے کی جو بیکار بھی ہے۔
۲۰۱۵ء