آؤ تمھیں سنائیں اک شہر کی کہانی
اُس شہر پر ہوئی تھی چیلوں کی حکمرانی
گلیوں میں لوگ گُم سُم حیران گھومتے تھے
ایسا عذاب آیا پتھر بھی ڈر گئے تھے
اُس شہر کی حدوں پر یوں اُڑ رہی تھیں چیلیں
اُس شہر کا فلک ہی جیسے بنی تھیں چیلیں
چیلوں نے کر دیا تھا سب آسمان کالا
سائے سے ان کے شاید سارا جہان کالا
بد وضع ہر عمارت، بے سُود ہر مہارت
چیلوں کا رزق ہر شے، سب محنتیں اکارت
قصہ ہے یہ پُرانا، یہ بات ہے پُرانی
کیوں آ گیا تمہاری آنکھوں میں سُن کے پانی