سمیٹتے ہوئے جنموں کی پیاس چلتے رہے
بلا کی دُھن میں ستارہ شناس چلتے رہے
شفق نے ہاتھ بڑھایا تو ہم گریباں چاک
تری نظر سے بچھڑ کر اداس چلتے رہے
لگا تھا شہر میں میلہ سفید پوشوں کا
سو گھٹڑیوں میں اٹھا کر کپاس چلتے رہے
وہ شکل یاد نہ آئی تو سانحہ یہ ہوا
ہزار نام پس,اقتباس چلتے رہے
ہوا رُکی رہی، لہروں نے کوئی بات نہ کی
ہم اپنی موج میں دریا کے پاس چلتے رہے
وہ ٹوٹتی ہوئی انگڑائیاں تھیں توبہ شکن
سو خوش معاش بچا کر حواس چلتے رہے
پتہ کسی سے نہ پوچھا چراغ چہروں کا
لہو میں آگ بھری، خوش لباس چلتے رہے
※※※※※