تجھ سا ترا خیال مرے ساتھ ساتھ تھا
شہرِ شبِ وصال مرے ساتھ ساتھ تھا

میں تھا کہاں تھا مجھے کچھ خبر نہ تھی
ازبسکہ اک سوال مرے ساتھ ساتھ تھا

واں دشتِ زندگی میں زمانوں کی ریت پر
غم کیچوے کی چال مرے ساتھ ساتھ تھا

پھیلی تھی دور دور تلک نکہتوں کی باس
اُس شب مہہِ شوال مرے ساتھ ساتھ تھا

عرشِ بریں کی سیر سے رضواں کی عیش تک
میں خاک تھا زوال مرے ساتھ ساتھ تھا

اک نور باغ باغ مرا منتظر تھا، اور
اک درد ڈال ڈال مرے ساتھ ساتھ تھا

شب زاد تیرے شہر میں آنے سے پیشتر
وحشت کا اک وبال مرے ساتھ ساتھ تھا

میں کوہ و دشت و بن میں جسے ڈھونڈتا پھرا
وہ آئینہ مثال مرے ساتھ ساتھ تھا

وہ درد جس نے موت کا دم سرد کر دیا
زاہد وہ کتنے سال مرے ساتھ ساتھ تھا