آنکھ سے خواب کا مَنظَر نہ اُترتا چلا جائے
راہرو ہے کہ ہر اِک گام پہ ڈرتا چلا جائے

چاکِ دِل ہے کہ نہ بڑھتا ہے نہ بھر پاتا ہے
زہرِ غم ہے کہ دلِ چاک میں بھرتا چلا جائے

میری آواز نہ کھو جائے زمانوں میں کہیں
تیرا چہرہ پسِ مِضراب بِکھرتا چلا جائے

اُس کی آوارگیئ کوَن و مکاں لا محدوُد
جو مُسافِر حدِ امکاں سے گزُرتا چلا جائے

اور اپنا کوئی ہو بھی تو کہاں روک سکے
دِل وہ خود سر کہ ہَر اِک رہ سے گُزرتا چلا جائے