جُنوں قرینہ اِہل ِجہاں سے خالی رہا
برستی آگ تھی سَر سائباں سے خالی رہا

تمام عُمر بھٹکنے دیا نہ توسَنِ فکر
یقین، حیرت و لطفِ گُماں سے خالی رہا

ہمارا کیا کہ نظارے میں محو تھے ہم تو
تِرا جہاں تھا تِری ہی اماں سے خالی رہا

کِسے خبر یہ تِری کج ادائی ہے کہ مِری
تِرا صحیفہ مِری داستاں سے خالی رہا

کہیں ملا بھی تو اِک دَستِ سنگ بار ملا
جُنوں نصیب کَفِ مِہرباں سے خالی رہا

وہ بادباں کہ سِتارہ شناس ہے اب بھی
مِرا سَفینہ اُسی بادباں سے خالی رہا