شَب کی خاموشی میں دِیپک راگ ہے چاروں طرف
یہ تِری چَھب ہے کہ میری آگ ہے چاروں طرف

میرا ہر سُورج نِکلتے ہی نِگل لیتا ہے کون
کیسی تاریکی کا کالا ناگ ہے چاروں طرف

پھر مُجھے آواز دے کر چھُپ گیا ہے کون کون
کھیل ہے یا دوستوں کی لاگ ہے چاروں طرف

یہ جو دُنیا ہے اِسے اِک گُھونٹ میں پی جاؤں میں
میرا پھیلایا ہوا کَھٹ راگ ہے چاروں طرف

قریہء باروُت میں چقماق کے پتھر ہیں لوگ
دیر ٹکرانے کی ہے پھر آگ ہے چاروں طرف