رایگاں جاتے ہیں ہم قریہء ویران کے بیچ
خاک اُڑتی ہے ہماری کِسی میدان کے بیچ
تیری خُو بُو سے کیے ہم نے زمانے پَس و پیش
غیر اُلجھا ہے تِری زُلفِ پریشان کے بیچ
سر اُٹھائے گی نہ پھر خواہشِ سرتاب کوئی
ایسا پتھر ہے کفِ دستِ پشیمان کے بیچ
حسرتِ چشم جہَاں بِیں تِرا حاصِل معلوم
ایک آنسوُ ہے فقط دیدہء حیران کے بیچ
یوُں ہی رقصاں تو نہیں ہُوں کہ مِری حالتِ خُوب
جانتا ہُوں کہ بدل جائے گی اِک آن کے بیچ
ہو ٰخجالت نہ کِسی کو سرِ وِیرانہء طُور
آگ اَپنی بھی لیے جاتے ہیں سامان کے بیچ