اکھیں نوٹاں۔؟ نوٹ لئیاں!
دور تائیں ساول دا کڈھا
دور تائیں پانی دا شیشہ
شیشے اتے دھپ، چار چفیرا چپ
میں چپ دے وچکار، کھلوتا۔۔
سر سدراں دا بھار،سکاں، پیلا پار
پانی پیراں دے وچ ڈلھکے، کی کرییے نروار
کڈھے ال جے نیوں کے ویکھاں، کڈھا میرے اتے
اسماناں دا نیلا تنبو، سو اتے سو ہیٹھ
پوہ دی ککھ اچ جیٹھ
ایدھر سورج سر تے دھریا، اودھر پانی وچ
چھل چھل پانی چھلکاں مارے، سپنی گھولے وِس
سورج مکھی واء اچ ڈولے
پانی جنج پتاسا گھولے، ہولے ہولے
باراں تالی واء چگھڑتیاں کردی پانی نال
چھلاں اٹھن، چِھٹاں اُڈن، چُھلکے من دا تھال
جُسے ڈولن، پانی ڈلھکے۔
روے وکھو وکھ، ہر ٹاہنی ہر اَکھ
اکھ دا سورج ڈولدی ساول، پانی اچ پتاسا
جنجے شیشے دے وچ چیکے چانن دا بھرواسا
سورج جھٹ دا ہاسا
اتے ہیٹھ سمے دا جھانجھو وچ ہنیراگھپ
پانی چھلکے ساول ڈولے، کُھرے پتاسہ نال
دل آجھڑ نال ڈبدا جاوے جیوں جیوں تھرکے تھال
اکھیں پٹاں۔۔؟