المان میں رات کے اس پہر
ایک ہی کرسی پر بیٹھے
ایک ہی منظر کو گھورتے
جب نوکری پر نائٹ شفٹ کرتے
میرا ساتواں گھنٹہ چل رہا ہے
تو بظاہر سب ساکت ہے
سکوت میں ہے
مگر باباطن تمہاری سوچوں کا سیال
کسی گُھمن گھیری کی طرح
میرے دل و دماغ کے
سبھی نہاں و عیاں گوشوں میں
بے آواز طوفاں برپا کیے ہوئے ہے
تم جو کوسوں دور
اپنے اطراف میں روشنی پھوٹنے کا منظر نامہ
فراموش کیے
باہنی جانب کھلنے والی کھڑکی کے ساتھ لگے
کنگ سائز پلنگ پر اکیلے سو رہے ہو
تمہیں کیا خبر
ساکت منظروں میں ترتیب پانے والے
خاموش طوفان
کیسی تباہی کا پیش خیمہ ہو سکتے ہیں
تمہیں کیا خبر
رت جگوں میں پلنے والے
کالے عشق
کیسی گہری آنکھوں کا مدفن ہو سکتے ہیں
میرا تم سے محبت نہیں جنون کا رشتہ ہے
اور مجنون کی آہ سے خود جنون بھی خوف کھاتا ہے
تم جو میرے جنوں کو نڈر ساحلوں سے ہو کر
للکارتے رہتے ہو
تمہیں کیا خبر
طوفانی راتوں میں ساحلوں سے لوٹنے والی صدائیں
اپنی جون سے بگڑی ہوئی حالتوں میں پلٹتی ہیں
کھبی جو تم انکے مسخ شدہ چہروں پر
وحشت کی آڑی ترچھی سطریں پڑھ پاؤ
تو ایک لا مختتم بے خوابی کے مرض میں پڑ جاؤ
نظم
یہ تحریر 535 مرتبہ دیکھی گئی