حاکمِ شہر کا یوں مجھ پہ کرم ہوتا ہے

حق جو لکھوں تو مرا ہاتھ قلم ہوتا ہے

آنکھ اٹھا کر جو ترے شہر میں چلتے ہیں بہت

سر انھیں کا تری سرکار میں خم ہوتا ہے

روز ہوتا ہے کوئی موت کی محمل میں سوار

روز آباد ترا شہرِ عدم ہوتا ہے

ورنہ جنگل میں ترے خاک اڑا کرتی ہے

کوئی آہو چلا آتا ہے تو رم ہوتا ہے

ناامیدی میں زمیں تنگ نظر آتی ہے

حوصلہ ہو تو فلک زیرِ قدم ہوتا ہے

مہربانی میں نہیں کم ہیں یہ خوباں لیکن
جاں نکل جاتی ہے تن سے تو کرم ہوتا ہے

پہلے کٹتا تھا سرِ سینہء مقتل اور آج
کرسیِ عدل پہ سر میرا قلم ہوتا ہے

ٹیس اٹھتی ہے تو کچھ اور اسے اٹھنے دے
درد جب حد سے گزرتا ہے تو کم ہوتا ہے

ہم ہی ہر معرکہء صبر میں جاں دیتے ہیں
سر سنانوں پہ ہمارا ہی علم ہوتا ہے

اور اب کیا ہوں نمایاں کہ ستونِ حق پر
قلمِ خوں سے مرا نام رقم ہوتا ہے

تازیانوں سے زیادہ یہ کسے ہے معلوم
جو ستم کرتے ہیں ان پر بھی ستم ہوتا ہے

اس کی فریاد میں دکھ میرا بھی شامل ہے انیسؔ
نوحہ وہ کرتا ہے دیدہ مرا نم ہوتا ہے