یہ اب جو کربلا سب کے سخن میں آشکارا ہے

بہت پہلےسے میری شاعری کا استعارہ ہے

ابھی ہم طفلِ مکتب تھےمگر احساس تھا ہم کو

یہ خوں کا معرکہ معنی کشائی کا سپارہ ہے

اگرمشقِ سخن میں رات دن مصروف ہم رہتے

تو ہم کہتے کہ یہ طرزِ سخن سارا ہمارا ہے

چلو خامہ کوئی ہو مہرِ معنی ہو گیا روشن

نہیں کچھ بحث اس سے کیا ہمارا کیا تمھارا ہے

بہت گزرے سلاطینِ سخن از میر تا غالب

مگر لفظ و معانی پر یہاں کس کا اجارہ ہے

سلیقہ ہے یہ حرف و صوت کو ترتیب دینے کا

کہیں کیوں پیکرِ شعر و سخن ہم نے سنوارا ہے

کوئی گریہ کناں رہتا ہے روز و شب مرے اندر

یہ اس کا قرض ہے میں نے غزل کہہ کر اتارا ہے

نہیں یہ حرف ہیں، یہ زخم ہیں جو میں نے کھائے ہیں

کتابِ شاعری میں جا بجا خوں آشکارا ہے

محبت میں سبق کچھ سیکھنا تھے بے وفائی کے

غلط کیا ہے جو میں نے اِن بتوں پر دل کو وارا ہے

کھلی جو آنکھ تو جانا کہ ہم نے خواب دیکھا ہے

اِدھر ہے اک پری چہرہ اُدھر اک ماہ پارہ ہے

سو اب کے میرا جل کر خاک ہو جانا یقینی ہے

میں جس پر جان دیتا ہوں وہ گل رو اک شرارہ ہے

اسی میں اپنا دکھ اپنا الم سب رکھ دیا میں نے

یہی پارہ سخن کا زندگی کا گوشوارہ ہے

اٹھائے رنج دنیا کے ہزاروں بار ٹوٹا ہے

سلامت جو نظر آتا ہے دل وہ پارہ پارہ ہے

وہ جب پہلو میں بیٹھا ہو فلک کی سیر کیوں کیجے

یہیں مہتاب روشن ہے یہیں روشن ستارہ ہے

ابھی کچھ دن ہمیں سیلِ بلا میں اور رہنا ہے

ابھی کشتی نہیں سنبھلی ابھی اوجھل کنارا ہے