برقِ چشم ناز کا اعجاز تھا

دل کا ہر ذرہ تجلی ساز تھا

بجھ گیا آخر چراغِ شام بھی

اک یہی باقی مرا ہم راز تھا

دیر تک گونجی صدائے بازگشت

آخری نغمہ شکستِ ساز تھا

کائناتِ دل ہوئی زیر و زبر

یہ کرم تیرا نگاہِ ناز تھا

جیسے سناٹا سکوتِ موت کا

دل کی ویرانی کا یہ انداز تھا

اک کرشمہ تھا خرامِ دوست کا

فتنہء محشر کو جس پر ناز تھا

سوچتی کیوں رہ گئی چشمِ طلب

جب وہاں بابِ اجازت باز تھا

منزلِ آخر میں پنہاں شوق کی

ذرہ ذرہ میرا ہم آواز تھا