اب کے ہمارے شہر میں شورِ نوا کچھ اور ہے

سن تو رہے ہیں اور کچھ لیکن ہوا کچھ اور ہے

کرسیِ عدل پر عجب ہے اس کی منصفی کا ڈھب

میں نے کہا کچھ اور تھا اس نے سنا کچھ اور ہے

اب کے شجر کی شاخ پر کوئی نہ آئے گا ثمر

پہلے ہَوا کچھ اور تھی اب کے ہَوا کچھ اور ہے

میں نے امیرِ شہر کے جھوٹ کو جھوٹ کہہ دیا

پہلے بھی کم خفا نہ تھا اب وہ خفا کچھ اور ہے

تجھ کو شہی پہ اپنی ناز اور میں شہی سے بے نیاز

تیرا سرور اور کچھ میرا نشہ کچھ اور ہے

عشق کسی سے کرکے دیکھ تو بھی کسی پہ مر کے دیکھ

وہ جو ہے اِس میں جاں کنی اُس کا مزہ کچھ اور ہے

شمع شبیہِ یار کی جب سے ہے یاں دھری ہوئی

خانہء دل کے طاق میں اُس کی ضیا کچھ اور ہے

دیکھ کہ ایک ہی شاخ پر دونوں دوئی میں ہم دگر

برگ کا پیرہن ہے اور گل کی قبا کچھ اور ہے

معنی بدل گئے ہیں سب اِس کا ہے ایک ہی سبب

میں نے لکھا کچھ اور تھا اس نے پڑھا کچھ اور ہے

تسکیں نہ دے کوئی حبیب دارو نہ دے کوئی طبیب

دل میں جو میرے درد ہے اُس کی دوا کچھ اور ہے

ہے جو نظر کے سامنے وہ تو نظر کا ہے فریب

تیرے ہر ایک نقش میں میرے خدا کچھ اور ہے

ق

باغ نہیں وہ باغ ہے شاخ نہیں وہ شاخ ہے

شانہء گُل ہے اور کچھ دستِ صبا کچھ اور ہے