جنت کی ایک شام
ذوالکفل بخاری کے ساتھ
( نثری نظم )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یار !
تمہاری تو جنت میں کنفرم سیٹ ہے
مگر اس خطاکار نے
خامہ خراب نے بھی
بوجوہ امید بہشت رکھی ہوئی ہے ؛
تو ہم فرض کرتے ہیں
کہ جنت میں تمہارے محل سے متصل
میرا بھی پانچ مرلے کا مکان ہے ،
اور ہم دونوں سر شام
تمہاری سیاہ رنگ موٹر سائیکل پر
سیر گل کو نکلتے ہیں ؛
جنت میں بھی یقیناً کتابوں کی دکانیں ہوں گی ،
ہم وہاں سے مفت میں بہت سی کتابیں خریدیں گے ؛
واپسی پر علامہ اسلم انصاری کے دولت خانے پر بھی حاضری دیں گے ،
وہاں چائے پیئیں گے
اور شراب علم بھی !
یاد آیا
میں دنیا میں تمہارے سامنے
سگریٹ پینے سے ڈرتا تھا !
یار ! سچی بات ہے
میں جنت میں تمہارے سامنے
شراب پینے سے بھی شرماؤں گا !
۔۔۔۔۔۔۔۔۔۔۔۔۔۔۔۔۔۔۔۔۔
وحیدالرحمن خان