حکیم الامت ڈاکٹر مولانا سید قلب صادق کی نذر

گل تھیں جو شمعیں انہیں تو نے منور کر دیا
راہ کی تاریکیوں کو روشنی سے بھر دیا
جہل کے سب معرکوں کو فتح کرنے کے لیے
عقل کی تیغیں عطا کیں عِلم کا خنجر دیا
اس طرح اپنے خزانے کب لٹاتا ہے کوئی
سارے خالی دامنوں کو موتیوں سے بھر دیا
بولنا مشکل تھا، مشکل دیکھنا، تو نے مگر
لب کو گویائی عطا کی آنکھ کو منظر دیا
تو اٹھا تو سب کے ہاتھوں میں کتابیں آ گئیں
جوش کیسا حرف خوانی کا دلوں میں بھر دیا
مجمع روشن دلاں کو، شر سے بچنے کے لیے
جس سے ہو بس خیر کی تبلیغ وہ منبر دیا
سر سے پا تک اب تری ملت ستارہ پوش ہے
زیبِ تن کرنے کو تو نے جامہء اختر دیا
تیرگی کے مورچوں پر جنگ کرنے کے لیے
ماہتابوں کا علم خورشید کا لشکر دیا
تا نہ پہنچیں صبح کے صحنوں میں یہ تاریکیاں
شعلہء ظلمت پہ اپنا ہاتھ تو نے دھر دیا
خوں طلب تھی نورگاہِ شوق کی شمشیر جب
ایک ہی تھا میری صف میں جس نے اپنا سر دیا
خشک موسم میں بھی گل آثار شاخیں ہو گئیں
تو نے کیا کارِ نمو گلشن میں ایسا کر دیا
حرف سے تیرے ہنر کی عظمتیں روشن ہوئیں
اور ہنر نے ہم تہی دستوں کو گنجِ زر دیا
توڑنے آئے تھے جب پتھر ہمارے آئینے
شکل میں تیری خدا نے ہم کو شیشہ کر دیا
سر ہوئیں جب منزلیں تو سب کے سب کہنے لگے
کیا ہماری قوم کو اللہ نے رہبر دیا
روشنی تھی سو فلک پر اس کے رہنے کے لئے
خالقِ ارض و سما نے خانہء خاور دیا