موسمِ گل ہے اور وقتِ صباح
بھر صبوحی سے اے صنم مصباح
آج آنکھیں ہیں کیوں ملول تری
اے دلا رام اے بت مُلّاح
حیف ہو جائے غرقِ بحرِ الم
کشتیِ انبساط کا ملاح
حیف بن جائے غم کدے کا مکیں
شادمانی کے قصر کا طرّاح
حیف ہو جائے یوں غبار آلود
حسن کی روحِ خرم و مفراح
ننگ ہستی ہے گر مکدر ہو
گردِ مکنت سے حسن کا ممراح
پی صبوحی سنوار اپنا حسن
اے شہِ حسن اے بُتِ مُلاح
چشم ہے کحل کے لیے بے تاب
بیتِ ابرو ہے تشنئہ اصلاح
بن سنور کر حنا و غازہ سے
حسنِ غمگیں کو دے نویدِ مراح
گوندھ چوٹی میں نسترن کے پھول
یاسمن کے گلے میں ڈال وشاح
حسن کے شعلے کو فروزاں رکھ
اے شبستانِ ناز کے مصباح
حسن سے ہستیِ بشر شاداب
حسن سے جان و دل کو حاصل راح
حسن کا ریزِ مزرعِ اجسام
حسن خوشبوئے عالمِ ارواح
حسن سّرِ حیات کا کاشف
حسن قفل ممات کی مفتاح
حسن سے طرحِ عافیت محکم
حسن پر انحصارِ خیروفلاح
حسن پر سو تجلیاں قرباں
حسن کا ربِ طور خود مداح