پہاڑی لوکاں نی ویساکھ کتھا

یہ تحریر 132 مرتبہ دیکھی گئی

وساخے نے کُملے موسم اندر
ماڑے گراں نی تہرتی اوپر

راتی چرکا بدل بھرنا
گِلے نیھرے نی بکل کھولی
سرگی ویلہ سورج چڑھنا
ککڑ سُچیاں بانگاں لانے
خیری سُکھ نا تیہاڑا چڑھنا

وساخے نے کُملے موسم اندر
ماڑے گراں نے متھے اوپر

پیلے رنگ نی سریوں پُھلنی
رنگ پرنگے تیتر پھرنے
مور نے اگے مورنی جُلنی
سُوے کُٹ جے پُھل کھلارنے
چھچھرے آخیے مراجی بنڑتے
ٹالی کِکر بئیاں کمانڑے
لمیاں ڈالیاں ار پینگ چوجھانے
پلائیاں اوپر ماخیوں پکیا
لاہی کے سنگیاں اندر تہریا

وساخےنے کُملے موسم اندر
ماڑے گراں نے نَکیاں اوپر

چھٹنے چہرنے بغنے دریا
وادیاں اندر پُجنے دریا
چھننی تہپ نی سرخی پینی
مچھی مار کی مچھی دسنی
بیڑی والا بیڑی کڈنا
کسیٹے نال چھاڈمہ رکھنا
پانی نی چھانٹ ایر جالہ سٹنا
سینگھاڑا ماشیر کھروٹا بچوا
جو وی لبے چانا جانا

وساخے نے کُملے موسم اندر
ماڑے گراں نی سڑکے اوپر

چائی کے گڈوے ٹرنیاں جانیاں
اوچیاں لمیاں سُوہنڑیاں جنانیاں
پانی پہرنے کھُوے ار ملنیاں
دل نیاں گلاں اتھے ہی کرنیاں

پینو بانڑیں:
ماڑی سس نی ککڑی ایدکی
بچے تارے، انٹڑا مُول نی
جوانی کھائیاں ساری تیہاڑی
کُڑ کُڑ کرنیاں ساغے ای پٹنیاں
اناں کراناں ای نیولہ پئی جائے
اللہ ماڑی اک نی بُجھنا

آخے پینو! بس کر بندیے
چہٹ پٹ بولی شمع سیانی
کُڑیو! ماڑی گَل وی بجھو!
جیرا چہلا بانڑاں سا
ایدکی پادریوں جور پخسی
ساونڑ وی فِر تروٹی بر سی
کساں چڑسن، پہارو روڑسن
لوکاں وچ کمسان پئیسی
سارے گراں ای نصقان ہوسی

توائی خدا نی چُپ کر کوئیانی
پٹھیاں گلاں بانی جانی
سرے روں چھپرا اگے چائی کے
دوواں ہونٹھاں نے وچ پھسائی کے
شیمو ٹھیلہ مارےبانی
ہاں وہی رُوپا ماڑی رانی
تُو وہ با نا اپنی کانڑیں
سنتا تاڑا ولئیتی منگیتر
اج کل گراں اچ آیا پھرنا
تُکی چوری تکنے وسطے
کھُو نے رستے ٹہلنا چڑھنا

روپا پہلے ہکی بکی
چادر سدھی کیتیس اپنی
بنگڑی والی بانہہ چھنڑکائی کے
کجل والی اکھ پھڑکائی کے
ساریاں کولوں نظر بچائی کے
تُوتاں نی لَپ منوے اچ بائی کے
شروع کیتیس کہانڑی اپنی

وساخے نے کُملے موسم اندر
ماڑے گراں نی باڑیاں اوپر

کنکاں گاہنا ماہیا ماڑا
پھلاں نے بوٹے لوانڑاں ماہئیا
سِکھر دوپہری پلیار ترپی
تُوتاں نالمُٹھی پہری کے اپنی
آڑیو آڑی کھوے ار اشنا
مہیا ماڑا رستہ تکنا
اڈیکے نا مٹھا مزہ چکھنا
میں نہ ہواں فر وی اشنا
کھوڑی اچ ماڑیاں تُوتاں بائی کے
آپوں اگے ٹرنا جلنا

وساخے نے کُملے موسم اندر
ماڑے گراں نے ڈیریاں اوپر
سکھ نیاں گیتاں گانے سارے
تیہیاں پتر بیاہنے سارے