مجھے ڈراؤ نہیں ہولناک قسمت سے

کہو نہیں کہ ہے بے لطف سرزمینِ شمال

چلو کہ مل کے مناتے ہیں آج پہلی بار

وہ جشن جس کو زمانہ فراق کہتا ہے

ہمارا مل کے بچھڑنا ہے ہجر کا تیوہار

نہ مل سکیں گے سہانی سحر میں ہم ، نہ سہی

نہیں رہے گا اگر چاند ہم قدم ، نہ سہی

مگر یہ تحفہ رخصت جو آج دیتی ہوں

عجیب شے ہے ، کسی کو کوئی نہیں دیتا:

یہ دیکھو ، ہیں مری پرچھائیاں جو پانی پر

بوقتِ شام کہ بے کل ہے نیند سے دریا

نظر جو ٹوٹتے تارے کی بے بسی میں ہے گم،

صدا جو اب ہے گلے میں رندھی ہوئی آواز،

کبھی گمکتی تھی ، تازہ تھی ، کھنکھناتی تھی

یہ تحفے ماسکو کے پاس کام آئیں گے

وہاں کی چڑیوں کی سرگوشیاں سنائیں گے

ستا سکے گا نہ سیلن سے اپنی اکتوبر

مئی کی نرم ہواؤں کا لطف پانا تم

مگر مجھے ، مرے پیارے ، نہ بھول جانا تم

بہت دنوں نہ سہی ، پہلی برف باری تک

ترجمہ : ظ ۔ انصاری