دو کمرے نے کچے کہر وچ
مہاڑی نانی بسنی سی
لکڑی نا اک ٹوٹا ٹھوکی
بوئے کی چٹخنی لغنی سی
دو پتھر کندھے چوں کڈھی
روشن دانی بنی سی
جس وچ تکی چوغا پانی
تاولی گٹاری اشنی سی
صباح سویرے ناں خدا نا
ہِنؔی نانی اٹھنی سی
سبز کتاب غلاف چڑھائی کے
اُچی چھتی ایر رکھنی سی
بہیڑے ای پانی چھڑکی کے
چاڑھو مانجھا کرنی سی
اک ڈوری وچ مرچاں پروئی کے
تھمے ایر ٹنگی شوڑنی سی
اک ٹوکری وچ ہاڑیاں بائی کے
تُہپے وچ سکانی سی
تیہاڑی بیٹھی موزے بننی
شامی چھِڑیاں چننی سی
تاکے ای بلنی چمنی رکھی
آولے ای روٹی پکنی سی
تیہاڑی دانہ چغنے والی
گٹاری راتی سئی جانی سی
روشن داناں، بِتھاں وچوں
چاننی اندر آئی جانی سی
دو کمرے نے کچے کہر کی
چاندی محل بنائی جانی سی