ہم پہلی بار کہاں ملے تھے
شاید موریسن کلب کے ڈانس فلور پر
جہاں تم نشے سے چور ہو کر ڈگمگا رہی تھی
ہم پہلی بار کہاں ملے تھے
شاید ڈینیوب کے کنارے
جہاں تم جنگ میں شہید ہونے والے فوجی کے جوتوں میں پھول رکھ رہی تھی
ہم پہلی بار کہاں ملے تھے
شاید بوبیتا اتسا بس اسٹینڈ پر
جہاں تم کسی بس کا انتظار نہیں کر رہی تھی
ہم پہلی بار کہاں ملے تھے
شاید فشرمین کے پرانے قلعے میں
جہاں اب مچھیروں کا داخلہ منع ہے
ہم پہلی بار کہاں ملے تھے
شاید ہالووین کے تہوار پر
جہاں تم یونی کارن کے روپ میں ایک کاو بوائے کو تلاش کر رہی تھی
ہم پہلی بار کہاں ملے تھے
شاید ایک کافی شاپ میں
جہاں ایسپریسو کی کڑواہٹ کے دو ہی طلبگار تھے
(آدمی کا حافظہ اس کے وعدوں سے زیادہ کمزور ہوتا ہے)
آج ایک عرصے کے بعد
آخری ملاقات کے لیے
جگہ کا انتخاب کرتے ہوئے
میں سوچ رہا ہوں
کہ ہم پہلی بار کہاں ملے تھے؟