تمہیں سونگھنے کے لیے
خوشبو کا
مہنگا ہو جانا ضروری ہے
دنیا کے سستے کولونز
تمہارے بدن کی رفاقت کے چند لمحوں کا
حق ادا کیسے کریں
کہ تم نے پھولوں کو رات گئے
شبنم سے لپٹنا سکھایا
اور صبح
مَسلی ہوئی پتیوں کو
سفید شکنوں کا رازدار کیا
ایک دن نہاتے سَمے
تمہارے لَمس سے غافل قطرہ
زمیں پہ گرا تھا
سمندروں کے سینوں میں
اُس دن سے آگ لگی ہے
اور آدم زاد
اسے دنیا کی آخری قیمتی شراب کیے
گناہ کی آخری سیڑھی
برابر چڑھتے جا رہے ہیں !