تم نے نہ جانے کون سے پُل سے مجھے پکارا
مجھ سے رُکا نہیں گیا
جب تمہاری آواز آنا بند ہو گئی
میری واپسی کا سفر شروع ہوگیا
ایسا سفر جس میں کرچیاں نہیں تھیں
سرخ نشانوں سے بھری ایک خاموش زمین تھی
میری ماں نے میرے سامنے
کئی لوگوں کو آوازیں دیں
اور جب مجھے پکارا
تب تک مَیں زندان کی سیڑھیاں اتر چکی تھی
جہاں قتل کی گئی صداؤں کو رکھا جاتا تھا
پھر آوازوں نے ایک صحرا ڈھونڈ لیا
جہاں بہت سال ایسی آندھی چلی
جس میں چیخیں سرسراتی تھیں
اور جب میں نے خود کو پکارنا چاہا
تو میری جگہ اُس لڑکی نے لے لی
جو کسی کو آواز نہیں دینا چاہتی