O
اے جانِ نشّہ، روحِ مئے ناب آ کبھی
حرفِ نگفتہ، معنیِ نایاب آ کبھی
تاریک ہے مری رگِ جاں اک زمانے سے
اے رشکِ مہر، غیرتِ مہتاب آ کبھی
نکلے کسی طرح یہ مرا شوقِ عافیت
تو میرے گھر میں صورتِ سیلاب آ کبھی
ہاں میرے پاس شورشِ اہلِ جہاں سے دُور
ہاتھوں میں تھام کر صدفِ خواب آ کبھی
موتی ہوں میری آب کفِ دست پر نہ دیکھ
ہو مجھ کو دیکھنا تو تہِ آب آ کبھی
مجھ پر بہت گراں ہے یہ یکسانیئ حیات
سینے میں پِھر سے اے دلِ بے تاب آ کبھی