ابتدائی صفحات کے کھو جانے کی کہانی
معنی کے غیاب کی کہانی تو نہیں
تلاش کا عمل
کتنا صبر آزما ہے
صفحات نے کتاب سے اپنی بغاوت کا اعلان کیا ہے
یا مصنف کی رخصتی کا
مصنف کی موت کا فقرہ اب
خوش نہیں آتا
ابتدائی صفحات مل بھی جائیں تو انہیں کہاں اورکیسے شامل کیا جائے
ابتدائی صفحے کتاب کا چہرہ ہیں
مگر بغاوت پر آمادہ ہیں
انہیں اپنے اصل مقام کی تلاش ہے
ہر دن کوئی کتاب اپنی بے چہرگی کا اعلان کر دیتی ہے
صفحات کے غائب ہونے کا سلسلہ کب سے شروع ہؤا
کتابوں کے جلانے کی تاریخ بتائی جا سکتی ہے
صفحات کتابوں سے گریزاں ہیں
غیاب کی کہانی ان کتابوں کی رسوائی کی کہانی تو نہیں جنہیں کہیں کہیں سے کچھہ پڑھا جا سکتا ہے
ابتدائی صفحے کیا کہتے ہیں
انہیں اپنے آزادانہ وجود پر اصرار ہے یا دکھ ہے بچھڑنے کا
صفحات مل جائیں تو انہیں ایک کتاب کی صورت دی جائے
ایک مصنف کی کتابوں سے نکلے ہوئے صفحات ایک سے زیادہ زہن کا پتہ دیتے ہیں
جب ایک سے زیادہ مصنف کی کتابوں سے نکلے ہوئے صفحات ایک ہی ذہن کا پتہ دیں
یہ واقعہ ہے یا میرا خیال
شرم آ تی ہے
برکھا برسے اور وہ صفحات دھل جائیں

کتابوں کے ابتدائی صفحات کو تلاش کرنے ہوئے آ نکھیں تھک چکی ہے
تھکن کا احساس وجود کو پارہ پارہ کیے دیتا ہے
کون سا صفحہ کہاں سے کب غائب ہوا
ہوا کا جھونکا پرانی کتابوں کے ساتھ خود کو آ زماتی ہے
صفحات کے غائب ہونے کا دکھ مصنف کو نہیں
مصنف کا وقت کتاب کی اشاعت کے ساتھ شروع ہوا تھا اور ختم بھی
سرور الہدی

دہلی
17 مارچ 2024