ہمیشہ سے
لوگ درباروں پرپھول چڑھایا کرتے ہیں
ہمیشہ سے
میں درباروں کے
پھول چرایا کرتی ہوں
یہ عادت نہیں ہے
ادا ہے
ایک ادا جِس سے میں نے صوفیوں کو جانا
ایک ادا
جس سے میں نے شاعروں کو مانا
یہ سلسلہ
شروع قصوری بابا بُلھے شاہ سے ہوا
اورختم کبھی نہیں ہوا
داتا صاحب لاہور سے لیکر
رومیِ کشمیر محمد بخش کی آرام گاہ سے ہوتا ہوا
کوٹلی شیر شاہ دربار تک پہنچا
آخری پھول
جو میں نے چُرایا تھا
وہ چِکڑی بہک کی سہیلی سرکار کا تھا
میاں فراز تو کہہ گئے
‘جسطرح سوکھے ہوئے پھول کتابوں میں ملیں’
مگر اے دشمنِ جاں
کس طرح سوکھے ہوئے پھول کتابوں میں ملیں
جبکہ اُس کلیاتِ منیر میں
جو میری ہے
اب تک درباروں سے چُرائے پھول مہکتے ہیں
وہ سوکھ جانے کے بعد بھی سدا مرے دل میں چہکتے ہیں
پھولوں کا اب میں نے کرنا بھی کیا ہے
کہ وہ جسکے نام مَیں نظموں کے عوض
چُرائے گلابوں کی پتیاں دان کِیا کرتی تھی
وہ پہاڑی شاعر
اب اپنی نظمیں نہیں سناتا
سچ پوچھو تو
وہ کسی کو بھی اب اپنے دل کا حال نہیں بتاتا
میں پھر بھی اسکی یاد میں
ہر صبح چوری کے پھولوں کی زیارت کے لیے
مختلف کتابوں کی پرتیں کھولتی ہوں
ایک ایک معطر لمحے میں
شعر پڑھتی اور کہتی ہوں!