زمیں کی چال نہ دورِ قمر سمجھتا ہوں
مگر یہ بات کہ رمزِ ہنر سمجھتا ہوں
خزاں کو فصلِ بہاراں سے کیوں کروں موسوم
خزف کو خاک، گہر کو گہر سمجھتا ہوں
یہ سوچنا مرا، باعث ہے میرے ہونے کا
اگر یہ عیب ہے اس کو ہنر سمجھتا ہوں
تو کیا ہے گردشِ سیّارگاں سے ربط مجھے؟
کہ زندگی کو سفر در سفر سمجھتا ہوں!
یہ خود فریبی کی صورت ہے یا حقیقتِ حال
سیہ شبی کو بیاضِ سحر سمجھتا ہوں
غلط نہیں کہ بہت سے سخن ہیں ایسے جنھیں
زباں پہ لا نہیں سکتا مگر سمجھتا ہوں
گدائے شہر بس اب توڑ ڈال کاسہء ننگ
تُو ایک عمر سے ہے در بدر، سمجھتا ہوں!