کہوں کیا ان دنوں کیا حالت مَے خوار ہے ساقی
ہے ساغر سامنے پینے سے جی بیزار ہے ساقی

وہ ذوقِ مے پرستی بادہ نوشی شعلہ آشامی
اب اس کا ذکر میرے سامنے بے کار ہے ساقی

ترے آدابِ مے خانہ سے ان رندوں کو کیا نسبت
نگاہِ بے طلب ہی مایہ پندار ہے ساقی

طبیبوں نے ہزاروں اپنے نشتر آزمائے ہیں
مگر یہ زندگی بیمار کی بیمار ہے ساقی

اجازت دے تو اب سجدہ کروں نمرود کو میں بھی
کہ نوری دور بدلا اب زمانِ نار ہے ساقی

کسک کی زندگی قائم ہے طوفاں خیز موجوں سے
مرا ساحل پہ جینا دو گھڑی دشوار ہے ساقی

گیا وہ دورِ مستی اور ہے اب ہنگام ہشیاری
ہماری زندگی اب فتنہ بیدار ہے ساقی