ہو گئی خاموش لَو گل ہو گیا سب کا چراغ
ہے مگر روشن ستونِ حرف پر میرا چراغ
اب ہوا چاروں طرف پھیلا رہی ہے روشنی
رکھ دیا ہے میں نے اس کے جسم میں اپنا چراغ
اب اسی تاریک شب کے ساتھ رہنا ہے مجھے
کیا ستارہ کیا کرن مہتاب کی کیسا چراغ
اور تھوڑی دیر تیرے ساتھ ہے یہ روشنی
رات اب جانے کو ہے بجھنے کو ہے تیرا چراغ
شب گزیدہ شہر کی دریا دلی تو دیکھیے
روشنی مانگی تو ہر گھر سے نکل آیا چراغ
پیش کرنا تھا کوئی تحفہ حضورِ شب مجھے
سو ہوا میں خاک اپنی خاک سے ڈھالا چراغ
ہم ازل سے روشنی تقسیم کرتے آئے ہیں
دے دیا دشمن کو بھی اس نے اگر مانگا چراغ
ہر طرف ہے سیلِ نور اور نور میں سیلِ سرور
جل رہا ہے خانہء دل میں ترے تن کا چراغ
شام کوئی شمع رو پہلو میں بیٹھا ہے انیسؔ
رات یہ کیوں جسم تیرا ہو گیا سارا، چراغ