کہاں وصال کے پہلو میں خواب سوتے ہیں
بس اس خیال کے پہلو میں خواب سوتے ہیں
میں اُس جگہ تھا جہاں روشنی کا مصدر ہے
وہاں جمال کے پہلو میں خواب سوتے ہیں
میں ماہ و سال کے بستر سے گرد کیا جھاڑوں
کہ ماہ و سال کے پہلو میں خواب سوتے ہیں
کوئی پکار کے کہتا تھا رات بسمل کو
ذرا سنبھال کے! پہلو میں خواب سوتے ہیں
یہ زندگی کا مسافر عجب نشے میں ہے
کہ اس کی چال کے پہلو میں خواب سوتے ہیں
جہاں کمال کی نوبت ہو دھوم پر زاہد
وہاں زوال کے پہلو میں خواب سوتے ہیں