غزل

یہ تحریر 424 مرتبہ دیکھی گئی

دُعا کی دَسَتکوں سے وَا نہ ہوں گے دَر ابھی اور
لَبِ دَریا کَٹیں گے سَرکشوں کے سَر ابھی اور

وُہی صحرا، وُہی اُجڑی ہوئی بستی وہی خاک
سَرِ محضر بَنیں گے آگ سے مَنظَر اَبھی اور

قیامت ہے چچا عبّاسؑ کا جانا بھی لیکن
بپا ہوں گے سُکَینّہ! سینکڑوں محشَر ابھی اور

نہیں انجام پایا کاروبارِ آتش و خاک
جلے گا عابِدِ بیمار کا بِستَر ابھی اور

ابھی تو کُلفتیں آغاز ہونا ہیں پسِ عصر
بُہت دہکیں گے اَوجِ شام پر خاور ابھی اور

پڑیں گی مُشکلیں کتنی ابھی قلب و نَظَر پر
رہیں گے کب تلک بے چارگاں مُضطَر ابھی اور

سلامی پر کُھلیں لَفظ و معانی کے نئے در
قلم تَرسے گا کب تک سِبطِؑ پیغمبر، ابھی اور