جہاں گرد(ترجمہ)

یہ تحریر 657 مرتبہ دیکھی گئی

کیم مونزو( Quim Monzo)
اصل کہانی( spainish)

حیاتی دے پاہلے 20 ورھے اُس سرکس اچ گذارے سَن. اج ایتھے ٹکانہ تے کل کوچ. ایہناں ویہاں ورھیاں وچ ہک وستی دی بھوئیں اُتے اُس دوبارہ پیر ناہ دھر کے نئیں ویکھیا. آکھن اوہ سرکس ہاہ، اوہ دیس دیس پھردا، جویں کوئی ونجارا گلیاں کچھدا پھردا ہووے.

    بازی گراں دا بال، نکیوں لا ای وَن سوَنّے محول اچ مست رہیا. وؤنیاں نال، بھنڈاں نال اوہندی پریت ہائی.شیر تے شیر نوں سکھاؤن آلے، رسی تے نِرت کرن آلے، کدھاڑیاں تے جُھوٹن آلے، منہ اچوں اگ کڈھن آلے، گھوڑے، ہاتھی اوہندے سنگی ہاہن. اوہ ترائے اجہے امریکی قبائلیاں، دو ہندستانی نچن آلیاں نوں جاندا ہاہ جیہڑیاں چھریاں دے وسدے مینہ اچوں ثبوتے نکل آؤندیاں. اوہ اجے 14 کو ورھیاں دا ہاہ جدوں اوہنوں ہک چھؤہِر نال پریم ہو گیا، جہڑی لگاتار ترائے ڈنگ سرکس دی دوئی قطار اچ آکے بیٹھی راہندی، تریجے دیہاڑے جدوں کُتیاں دا تماشا وکھاؤن آلی زنانی دی اوہ مدد کردا پیا ہاہ، اس چھوکری اوہنوں اکھ ماری. شرم نال اوہ لال رتا ہو گیا، اوہنون سجھیا کجھ نہ جو اوہ جواب اچ کی کرے. جدوں توڑی اوہنوں اس چھوکری نال گل کرن دی کوئی اٹکل سُجھدی. سرکس دے تنبو پٹے پئے ہاہن. ٹرکاں دی قطار ہر شئے لدی کسے ہور شہر دی راہ پئی جاندی ہائی.

جدن نوں اوہ ویہیاں ورھیاں دا ہویا سرکس دے ڈنگ ہرن لگ پئے ہوئے ہاہن. ہاری ساری دا خیال ایہیا ای ہائی جو سرکس توں سینمے یا ٹی وی دا مقابلہ نئیں ہونا. اوہ جہڑی سرکس اچ اوہ نوکر ہاہ اس اپنے تنبو پکے پکے ولھیٹ دتے. جِنھوں نوں کسے دوجی سرکس اچ نوکری لبھی اوہ اوتھے چلا گیا. پر سارے ایڈے نصیب آلے کتھوں ہاہن، اس عمرے اوہنوں وی کسے سرکس دی نوکری لبھ جاندی پر اس پیو دادے دے کم نوں چھڈ کے ہکے تھاہر ڈیرہ لاؤن دا اُدم کرلیا.

اوہ ہک ریلوے کمپنی اچ کلرک بھرتی ہو گیا. مڑ اگلے 20 ورھے اُس اِس وستی اچوں پیر باہر نئیں کڈھیا، ساری دیہاڑ اوہ باہرلے شہراں اچوں آؤن آلیاں ریل گڈیاں دے آوَن دا ٹائم مِتھن تے مڑ اوہندے اچ ردل بدل کرن اچ جُٹا راہندا، ٹِکٹاں تے چَھپے شاہراں دے ناں ویکھ کے اوہندا دل کدی وی نہ ہرکدا بئی ہک آری اوہ وی اوتھوں ہو آوے. جس بندے ویہاں ورہیاں دا ہون توں پاہلوں ای اَدھی دنیا پھر لئی ہائی.اُس ویہہ ورھے ہک سُن مسُنے گھر تے لوہے دے دراں آلے دفتر اچ گذار دتے. ویہہ سال اوہ ہکو سڑک لتاڑ کے دفتر آؤندا تے جاندا رہیا.

شروع دے دناں اچ اوہ ڈھکے بوہے مگر اکلاپے توں اَک کے اس ہک ہک کر کے اوہ ساریان شاہراں نوں چتاریا جہڑے اس کدی وی ڈٹھے ہاہن. مڑاوہنون انج لگا جویں اوہندا کل اوہندے توں ہولی ہولی دور ہندا جاندا اے. جویں ہک تھاہرے رہ کے حیاتی گذارن آسطے وکھرا سُبھا چاہیدا ہوے. کی پتا لنگھدے ویلے دے نال نال اوہ  اس ہک تھاہر رکی ہوئی حیاتی دا عادی ہو جاوے. اوہ سوچدا، مڑ وقت دے نال نال اس اوہ اس ہکو دائی حیاتی تے اس دے محول دا عادی ہندا گیا. جہڑا سوی آنگ اوہنوں اندرو اندری چٹ کے کھولڑ کیتی جاندا ہاہ. نرا ایہہ نئیں جو اوہ اس ہکو دائی ہوند نوں ڈکا لاؤن جوگا ناہ رہیا. سگوں بیتے دناں نوں چتارن دی طاقت وہ اس اچ نہ رہی.

روز راتیں اوہ کسے کاریگر دی کلا نال گھڑے ہوئے بالکل دوجی ہوند دے سفنے اُنندا. حیاتی جہڑی اس دیس دیس بھوں کے گذاری اوہندا ہک ہک ڈنگ ہر رات اوہندے سفنے رُنھ لیندا. ایسے طراں جدوں اوہ چالیان ورھیاں دا ہویا تاں اس سفنے اچ ڈٹھا، سرکس بند ہو گئی اے تے اس ہکے تھاہرے راہن دا نجٹھ لیا اے. ادھی راتیں اچن چیت اوہندی نیندر اگھڑ گئی. اوہ مڑھکیو مڑکی تے اُگھے ساہ پیا لیندا ہاہ. اوہنوں لگے جویں چھت اوہندے اتے ڈگن آلی اے. ویہہ ورھیاں دے سفنے توں جاگدیان ای اس ہر شئے پھوکی تے پیسہ دھیلا لئے کے پاہلی گڈی چڑھ گیا.

اور شہر شہر پھریا، اس فیصلہ کیتا بئی اوہ ہتھوں نکلے ورھیاں دا گھاٹا پورا کرسی. اس شہراں دے چِٹھے اچوں اوہ سارے ناں کٹ دتے جہڑے اس پاہلوں کدی ڈٹھے ہاہن. پنجاہ ورھیاں دا ہون توڑی اس باقی دی اَدھی دنیا وی پھر لئی ہائی. جہڑی اگلی عمراں اس ناہی ڈٹھی. جہڑے شہروں نکلدا اوہنوں لگدا اوہ اوتھوں ہمیش آسطے جاندا پیا اے. اوہندی پاہلی تکنی ای اخیر دی ہٗندی.

سارا جگ پھر لین مگروں کدائیں نویں تھاہرے پیر دھرنا اوہندے آسطے اوکھا ہو گیا ہاہ. کئی دناں توں اوہنوں سفنے وی ناہن پئے دسدے. اوہنے اس شہر دا ناں یاد کرن دے جتن کیتے جتھے اوہنون پاہلی آری ہک کُڑی نال پریت ہوئی ہایی. اوہ کڑی اوہندی پتریر ہائی. اوہ تاراں اُتے ٹردی ہاہ. جتن کر کے وی اوہ چتار نا سکیا بئی اوہ شہر برلن ہاہ یان ڈان ژگ. اوہنے ہک ہک شئے دھیان نال ویکھی ہائی؟ اس آپدے آپ توں پچھیا. جے انج ہندا تاں اوہنوں شہر دا ناں تاں یاد راہندا. کنیاں تھانواں اجہیاں ہاہن جنہاندا ناں یاد اچ سنبھال کے رکھنا ہُن اس دے وس اچ ناہ. بیتے کل دی یاد دے کئی حصے یاد اچوں مٹدے جاندے ہاہن. اوہنوں لگا دریاواں دا مہاڑ وی انج دا نئی جنج دا اوہندے چت اچ ہاہ. دنیا ویکھن دا مقصد؟ جے ایہہ شکلاں چیتے وسار ای دینیاں ہاہن. اس سوچیا، اوہنوں آپنی ہوند تنے ہوئے رسہ آنگ جاپی.

اوہ پرما دی گڈی اڈیکدا بیٹھا ہویا ہاہ. اوہندے ذہن دے چّٹھے اچوں سب توں پاہلا شہر مٹ گیا ویا ہاہ. اوہ شہر جتھے اوہندا جنم ہویا ہاہ، اوہنوں لگا جویں اوہندی ماں دا مہاندرا نشابر کرنا وی اوہندے ٓسطے اوکھے توں اوکھا ہندا جاندا اے. اوہندی ماں کیہو جئی ہائی. اوہنوں انج لگدا جویں اوہندی ماں دی مورت پانی دے شیشے اتے چھپی ہوے، جہڑی پانی دے ہلکوریاں نال پانی اچ گُھلدی جاندی ہوے. لکڑ دے پھٹے اُتے بیٹھا اوہ گڈی دیاں لیناں اچ اگے گھاہ اَلوں ویہندا رہیا. ہکے آری اوہ سنبھل گیا، اوہندیاں اکھیں اَگے کی شئے ہائی، جنگلی گھاہ؟ سَر؟ دَبھ؟ کی ہاہ؟ رکھاں، جھاڑیاں، بُوٹیاں دے ناں اوہندے چت اچوں ای نکل گئے ہاہن، آہ قطار اچ لگے ہرے کچور بوٹیاں دا ناں کی اے؟. اس آپدے آپ تون پچھیا پر اوہنوں کجھ یاد نا آیا.

اوہنوں انج لگ جویں اوہ کدائیں کھڑیچ گیا ہووے. اس اَکھ چکی تے پٹڑیاں دے دوجی لاہمے سرکس دا وڈا سارا پاٹا پرانا اشتہار لگا ہویا ہاہ. لحظہ کو اوہہوں چا جیا چڑھیا، اوہندا سرکس ویکھن نوں جی کیتا، اینے ورھیاں پچھوں سٹیج دے ساہنویں بہہ کے سرکس ویکھن دا خیال اینا ماڑا وی ناہ. اس تاریخ تھاہر ویکھن آسطے پوسٹر نوں نجھا کے ڈٹھا تے ہک چہرے دی دکھ اوہندی اَکھ نوں پھڑ لیا. سفیدی پھرے مکھڑے دی ہک اکھ تے کانٹی دا نشان نشابر ہاہ. دوئی اکھ ہیٹھ لکیر اوہ بڑے موہ نال ترائےکونی ٹوپی، پُھلی ہوئی نَک تے موٹے موٹے بُلھ تکن لگ پیا، اس ڈٹھا اوہ بلھ دو واری ہاسے نال کھلے وی تے مٹیجے وی.

پلیٹ فارم تے چپ دا راج ہاہ، اُس بنچ اتے نِسّل ہو کے اکھیں نوٹ لئیاں، اُباسی لیندیاں اس سجے کھبے دھیان ماریا، مینوں تاں ایہہ وی نشابر نئیں بئی اوہ شہر کیہو جیہا ہاہ جتھوں دا میرا جم اے اس دے تھکیویں سوچیا.

بوہا کھلن دی واج اوہندے کنی پئی. ہک زنانی سر کڈھ کے باہر جھات گھتی تے سجے کھبے ڈٹھا. مڑ اوہ چہرہ وی گُپت، بوہا بھیڑن دی واج ایلے اوہندا چت ہڈوں سکھنا ہاہ. اوہنوں ایہہ وی یاد ناہ پیا آوندا بئی جھٹ کو اگیرڑے اوہ بوہا کھلا ہاہ. کون اندر گیا ہاہ. کوئی اندر گیا وی ہاہ. یا اوتھے کوئی بوہا ہاہ وی؟ اوہنوں کجھ سمجھ نہ آیا بئی اوہندے نال ہندا کی پیا اے. اوہندے ذہن اچ ہک تصویر بنی، ہرے بھرے بھجے جنگل دے کنارے، کُنگو ورگے اسمان ہیٹھ چمکدا تلاں، ایہہ تصویر اینی نشابر، اینی صاف ہاہی جو اوہنوں سمجھ نہ آئی جو ایہہ منظر سچی مچی اوہندے سامنے ہے یا اوہ سرف کوئی پرچھانواں ایں جو اوہندے ذہن اچوں نکل آیا اے. مڑ اوہندا یاداں تے وس نا رہیا، مورتاں ہک ہک کر کے نشابر ہون لگ پئیاں، جویں ہوا نکلے تاں بھکانے اتاں نوں ابردے نیں. گھٹے اچ اَٹیا ہویا ہویا، سفیدا ویران کدھاں، کیوبسٹ فرنیچر، اچانک سب تصویراں غائب ہو گییاں. اوہندا ذہن یکدم خالی ہو گیا، بس ہک سیاہ مستطیل رہ گئی. اوہ بھل گیا بئی اوہ کیہڑے شہر نوں جاندا پیا ہاہ،اس حران ہو کے سجے کھبے ویکھیا، اوہنوں یاد نا آیا بیی ایہہ کیہڑی تھاہر اے. دوئیں لاہمی اسمان دے کناریاں اچ کھبیاں ہویاں لوہے دیاں پٹڑیاں کس آسطے ہاہن،ریل گڈی آئی تے اوہندی سیہان اچ ای نہ آئی جو ایہہ کی شئے اے. نہ تاں اوہ اوہنوں کوئی مشین لگی تے نہ ای کوئی بلا، ایہناں دوہاں شئیں دا مطلب وی اوہنوں بھل گیا ہویا ہاہ. اوہنوں ایہہ وی یاد ناہ جو ڈر کی ہندا اے، اس آسطے اس بچن دا کوئی چارہ وی نئیں کیتا.