آستین کا میل اجلی قمیض کے
ساتھ کتنا روشن ہو جاتا ہے
سفیدی کی سیاہی اور سیاسی کی سفیدی
کس نے کس کو روشن کیا
اندھیرا کم تھا اور روشنی زیادہ تھی
جیسے روشنی اندھیرے سے نکل رہی ہو
آستین کے میل کا اندھیرا
دل کا میل اور آنکھوں کا سرمہ تو نہیں
باہر کی کثافت کا اندر کی کثافت سے کیا رشتہ ہے
آستین کامیل کثافت کی پاکیزگی کا معیار ہے
میلی ہوتی ہوئی آستین سے لپٹی ہوئی شامیں اور راتیں
کتنی مختصر اور کتنی طویل ہو جاتی ہیں
اجلا رنگ اپنی تقدیر پر نازاں ہے
آستین کے میل کوروشن ہونے میں تھوڑا وقت لگتا ہے
میل کو ہٹانےکی کوشش
میل کو پھیلا دیتی
میل جب سیاہی بن جائے
تو اسے میل کی اگلی منزل کہتے ہیں
آستین کا میل مہذب معاشرے میں باریاب ہوتا ہے
اجلی قمیض کی آستین پرانے موسم کی منتظر ہے
اجلی قمیض کی آستین بھی
ابر آ لود موسم کا پتہ دیتی ہے