نہ ہو تو ساتھ ‘جب’ کچھ بھی یہاں اچھا نہیں لگتا
کوئی جتنا بھی ہو پھر مہرباں اچھا نہیں لگتا

کبھی جس دن تمھاری یاد کی خوشبو نہیں آتی
زمیں پاؤں میں سر پر آسماں اچھا نہیں لگتا

نہ ہو جب منتظر کوئی کسی کے لوٹ آنے کا
زماں اچھا نہیں لگتا مکاں اچھا نہیں لگتا

ہوائیں اچھی لگتی ہیں گھٹائیں اچھی لگتی ہیں
فضا میں دور تک پھیلا دھواں اچھا نہیں لگتا

نکھرتا ہے ترے ہی ذکر سے حسنِ بیاں اکثر
جو تیرا ذکر کم ہو تو بیاں اچھا نہیں لگتا